Rev 20 | YML | STEP | Vetalaga i 'a'ava, mulieta tamu anelose a 'iseni abamega i obuobuma, nimaneye Vatu'ai Manamanawena 'ana 'eba yavu wata bulava kainumu i 'ive'avinidi.

Revelation of John 20

Yaubada Seitani i yogoni i na miamia malamala 1,000 nagedie.

1 Vetalaga i 'a'ava, mulieta tamu anelose a 'iseni abamega i obuobuma, nimaneye Vatu'ai Manamanawena 'ana 'eba yavu wata bulava kainumu i 'ive'avinidi. 2 I obuma wayo'o kasikasisina i 'ive'avini i yogoni bega malamala 1,000 nagedie yogoyogonina i na miamia. Wayo'onina kasikasisina kumanina 'o'olo tuatuaina, 'ana wagava Diabolo 'alo Seitani. 3 I 'ive'avini i 'a'avana i taweni i obu Vatu'aie i sibodeni bega kebu tamu aitoi 'ana fata i na yavuya, wata kebu tomia fwayafwaya i na vevekaliediga. Malamala 1,000 i na 'a'ava, Yaubada i na tauyeni i na souyeni tutuya 'ale'usana faifaina.

4 Wata a 'isanago 'eba miabui 'ai'aiwabudi a 'isedi, 'eba miabuinidi 'waidie tomotoga ma yadi veimea Yaubada 'wainega, 'adi fata i na veveimea vematavuloga faifaina. Wata tomotoga 'ifwaidi 'anu'anunudi a 'isedi kumanidiavo basenadi i luvewafadi Iesu Valana 'Atumaina wata Yaubada yana Vona 'adi lu'ivona faifaidi. Wata tomotoganidi kebu i da 'odu'oduga tomotoga kasikasisina malavetayega 'ana kumaea 'alo taunina 'waidie, wata 'ana tugusa kebu i da 'ewai nimadie 'alo debadie. I wafa siwe i yawasa bega Keliso taiadi i na veveimea malamala 1,000 nagedie. 5 Yadi yawasa 'asa'aiana tovi-vaitugana kumekumetana, we'e towafa 'ifwaidi malamala 1,000 i na 'a'ava, mulieta i na tovoi-vaitugana. 6 Egavo nagami i tovoiga Yaubada yana tomotoga magemagetadi, ma yadi sosoana taiadi i na miamia, bega tutuyanina tosakona i na luku 'ai-'ala'alase i na wafaotoga, tomotoganidi kebu tamu vita i na veluagai. Malamala 1,000 nagedie i na vevetofolova Yaubada wata Keliso faifaidi, 'asa'aiana yadi tovelomu, wata ma fuedie i na veveimea.

S1 Ve 9:1S2-3 Ve 12:9 Iud 1:6S4 1 Kol 6:2 Ve 6:9, 13:16-17 Dan 7:27
S6 Ve 2:11 1 Fit 2:9

Yaubada i vetoketoke Seitani ma yana 'aila'avo i leodi.

7 Malamala 1,000 i na 'a'ava, mulieta Yaubada i na tauyeni Seitani i na 'etoyavuya yana 'eba yogona Vatu'ai Manamanawena 'wainega. 8 I na souyeniga i na nago 'awalawa 'aitamogana 'aitamogana 'waidie, tomotoga 'aila'a tulina tulina, kumanidiavo i goledi Gogi wata Megogi i na vevekaliedi. Seitani yana veimea 'wainega, tomotoganidi 'awalawa matatabuna 'waidiega i na va'augidi vetalaga faifaina, 'adi 'aila'a lu'iawawa-wayoga wala'ai 'ana 'ilukulukuta bani'odi. 9 Tomotoganidi fwayafwaya matatabuna 'waidie i na nagoi, Yaubada yana tomotoga wata 'atamananina i nuakalikalieniga i na tovififinedi. Nuanuadi i na leodi siwe 'ai-'ala'alata i na 'anita'ia abamega i na 'alaidi matatabudi i na wafa. 10 We'e Seitani, kumanina tomotoga i vekaliediga, Yaubada yana veimea 'wainega i na 'ive'avini i na taweni i na obu muna bwaikina 'waineye, basenadi tomotoga kasikasisina wata yana tolu'ivona-vekavekali, wata bei i tawedi. 'Ainina 'waineye i na veveviga lovana wata 'aiata kebu tamu sai'afo i na 'a'ava, i na 'eno-vagata.

S10 Ve 19:20, 21:8 Mad 25:41

Vonayavuga 'ana 'eba ve'a'ava.

11 Mulieta wata a 'isanago 'eba miabui 'ai'aiwabuna a 'iseni, bwaikina wata 'avu'avuna, 'ana tomotoga taiadi a 'isedi. Tomotoganina 'eba miabui 'waineye, bwaikaotogina wata magemagetana begaidi nani matatabuna abame wata fwayefwayeye i ve'aladegadega, i nagoi 'ani'ie siwe kebu tamu 'awasasa i da 'eno'eno bei i na giva tomotoganina 'wainega. 12 'Eba miabuinina mataneye towafa fuedi i tovotovoi, bwaikidi wata siaidi, bega buki 'ifwaidi i luyawagidi. Bukinidi nagedie towafanidi matatabudi yadi sauluva i lu'ivoneyedi bega Yaubada i na veimeyedi vematavuloga faifaina. We'e tamu buki i luyawagi, egavo 'adi wagava bei i kilumidiga, taunidi mia 'atumaina wata miamia-vagaina i na veluagai. 13 Egavo basenadi i wafaga malaveseye wata 'avale, wata towafa Vatu'ai Manamanawena 'waineye, matatabudi i souyedi i maia i vonayavuga yadi sauluva fwayefwayeye faifaidi. 14 Wafa wata towafa yadi 'eba mia Yaubada i tawedi muna bwaikina 'waineye matatabudi i 'a'ava. Egavo kebu 'adi wagava i da kilumidiga Yawai-vagata 'ana Buki 'waineye, Yaubada i veimea i na wafaotoga, i tawedi muna bwaikina 'waineye, wafa 'ana veluga i veluagai.

S12 Ve 20:5, 13:8 2 Kol 5:10 Fol 17:31S13 Lom 2:6 Ve 22:12
S14 1 Kol 15:24-26,54-55S15 Mad 25:41